Австралиската влада денеска објави дека видео платформата YouTube ќе мора да обезбеди дека сопствениците на сметки на неа имаат најмалку 16 години од декември оваа година, со што се поништува претходната парламентарна одлука која не го бараше тоа.
Владата веќе издаде мерки за возрасна граница за сметките на социјалните медиуми за Фејсбук (Facebook), Инстаграм (Instagram), Снепчет (Snapchat), ТикТок (TikTok) и X, а YouTube беше исклучен од тој пакет во парламентарната дебата во ноември.
Законот им забранува на децата под 16 години пристап до тие платформи, како и креирање сметки и објавување содржина.
Австралиската министерка за комуникации Аника Велс денеска објави нови правила кои одредуваат кои мрежи на социјални медиуми подлежат на ограничувања на возраста, а кои не.
Ограничувањата стапуваат на сила на 10 декември, а платформите ќе се соочат со казни од околу 28 милиони евра ако не ги исклучат малолетните корисници, соопшти владата.
Велс им рече на новинарите дека четири од 10 австралиски деца пријавуваат дека нивното последно штетно искуство на социјалните медиуми било на YouTube.
Таа додаде дека платформите мора да обезбедат алтернатива на предавањето на сопствената лична карта за да се потврди возраста на корисниците.
Децата ќе можат да пристапат до YouTube според новите мерки, но нема да имаат свои сметки.
YouTube изјави дека одлуката на владата „ја поништува јасната и јавна обврска за исклучување на платформата од забраната“.
-Ја споделуваме целта на владата за справување и намалување на штетата на интернет. Нашата позиција останува јасна: YouTube е платформа за споделување видеа со библиотека со бесплатна, висококвалитетна содржина, која сè повеќе се гледа на телевизиските екрани, соопшти YouTube. Во соопштението се додава дека YouTube „не е социјална мрежа“.
Австралискиот премиер Ентони Албанезе изјави дека Австралија ќе предводи кампања на форумот на Обединетите нации во Њујорк во септември за да се добие меѓународна поддршка за забрана за користење на социјалните медиуми од страна на децата.
-Знам од разговорите што ги имав со други лидери дека тие го разгледуваат ова и го разгледуваат влијанието што социјалните медиуми го имаат врз младите луѓе во нивните земји, рече Албанезе.
Новите правила нема да важат за видео игри, платформи за пораки и образовни и здравствени апликации, кои се сметаат за помалку штетни за децата.
Минималната возрасна граница е наменета за решавање на проблеми како што се зависно однесување, лошо ментално и физичко здравје и изложеност на несоодветна содржина, се вели во соопштението на владата.