Премиерлигашот Челзи попладнево се произнесе во врска со позитивниот допинг тест на украинскиот фудбалер за врска на тимот Михаил Мудрик.
За позитивниот допинг тест на 23-годишниот фудбалер стана познато претпладне. Во неговиот допинг тест „А“ е пронајдена забранета супстанција. Примерокот „Б“ се очекува да биде отворен во наредните денови. Доколку вториот тест е позитивен, играчот се соочува со четиригодишна дисквалификација.
- И клубот и Михаил целосно ја поддржуваат програмата за тестирање на Фудбалската асоцијација. Сите наши играчи, вклучувајќи го и Михаил, редовно се тестираат. Михаил категорично потврди дека никогаш свесно не користел забранети супстанции. Сега и Михаил и клубот ќе соработуваат со надлежните органи за да дознаат што го предизвикало позитивниот резултат од тестот. Клубот повеќе нема да дава дополнителни коментари, се вели во соопштението на лондончани.
Мудрик игра за Челзи од јануари 2023 година. Оваа сезона одигра 15 натпревари на кои постигна три гола и забележа пет асистенции.