Истражување спроведено од медицинскиот центар Mount Sinai од Њујорк сугерира дека земањето Вијагра, освен што го решава проблемот со еректилната дисфункција, воедно може да го намали ризикот од Алцхајмерова болест за 60 проценти.
Истражувачите откриле дека Вијаграта, уште позната како силденафил, го потиснува протеинот PDE5 што може да се најде во мозокот на оние кои се заболени од Алцхајмерова болест.
Студијата опфати повеќе од 27 илјади луѓе на возраст над 65 години. Податоците од истражувањето покажуваат и дека Вијаграта го зголемува снабдувањето со крв - корисно за подобрување на здравјето на мозокот, па потенцијално може да лекува и деменција.
Друга студија, спроведена во јануари оваа година, покажа дека овој лек го намалува ризикот од срцеви заболувања за 39%, како и ризикот од рана смрт за 25 проценти.
Истата покажа дека корисниците на Вијагра имаат 17% помала веројатност да доживеат срцева слабост и имаат 22% помали шанси да развијат нестабилна ангина, поради која коронарната артерија се блокира и доаѓа до спречување на протокот на кислород и крв во срцето.