Американскиот рок-пејач, актер и уметник роден како Марвин Ли Адеј, а попознат под уметничкото име Meat Loaf, почина вчеравечер, со сопругата Дебора покрај себе. Meat Loaf имаше 74 години.
-Знаеме колку тој Ви значеше и навистина ја цениме сета љубов и поддршка додека минуваме низ ова време на тага поради губењето на еден таков инспиративен уметник и прекрасен човек. Од неговото срце до Вашите души – никогаш да не престанете ’да рокате’!“, се вели во соопштението на семејството.
Како актер и „хард рок“ изведувач имаше улога во над 100 филмови, ТВ-серии, музички видеа итн. Негови можеби најпознати улоги се оние во „Роки хорор шоуто“ (1975) и „Боречки клуб“ („Fight Club”, 1999, покрај Бред Пит и Едвардс Нортон). Како музичар има вкупно над 80 милиони продадени примероци од своите плочи.
За песната „I’d Do Anything for Love (But I Won’t Do That)“ која мина пет недели на број 1 на листите во САД 1993 година, а се најде и на врвот во Обединетото Кралство, Meat Loaf освои и „Греми“ награда за најдобра рок-изведба.