Вашето тело не функционира исто на 40+ години како кога имало 20. Mускулната маса почнува да се намалува, тежината многу полесно се зголемува, наскоро може да започне менопаузата, а ризикот од хронички болести како канцерот, срцевите заболувања и дијабетесот се зголемува.
Еден од начините да останете здрави е внесување на доволно правилни витамини и останати хранливи состојки. Еве што треба да земате доколку сте над 40 годишна возраст:
1) Б12
Овој витамин се наоѓа во месото и производите од животинско потекло како кокошката, рибите, млекото и јајцата, а како телото старее така послабо се апсорбира, бидејќи нивото на желудочната киселина се намалува.
2) Калциум
Иако нашите коски апсорбираат поголем дел од калциумот кој им треба порано во животот (пред 30-тата година), оваа хранлива состојка игра голема улога во одржувањето на здравјето на коските понатаму во животот, како и за мускулните контракции, правилното функционирање на нервите и срцетo и други биохемиски реакции. Кога преку исхраната или суплементите не се внесува доволно калциум, телото го „краде“ од коските, притоа ослабувајќи ги.
Храна богата со калциум се млечните производи, тофу, сардини, брокула, спанаќ и бадеми, а веганите и оние нетолерантни на лактоза можат да го внесуваат калциумот и преку суплементи.
3) Витамин Д
Недостатокот на овој витамин е поврзан со дијабетесот, срцевите заболувања, мултиплекс склероза и ракот на дојки како и колоректалниот.
Го има во рибата и зајакнатите млечни производи и житарки, но генерално витаминот кој го има во храната едвај се апсорбира во телото. Најдобар извор на овој витамин е сонцето или пак да се зема во форма на суплементи, од кои се препорачува Д3.
4) Магнезиум
Клучната функција на магнезиумот е да го регулира крвниот притисок, а помага и при апсорпцијата на калциумот и игра улога во правилната функција на мускулите, нервите, срцето, и контролата на шеќерот во крвта.
Го има во зеленчукот со темни лисја, гравот, сојата, авокадото и др. Премногу магнезиум не претставува здравствен ризик, но може да предизвика дијареја, грчење и гадење.
5) Калиум
Калиумот игра клучна улога во одржување на правилниот крвен притисок, без разлика на годините.
Меѓутоа, треба да се внимава да не се зема во форма на суплементи без препорака од доктор, бидејќи премногу калиум може да го оштети гастроинтестиналниот тракт и срцето, како и да предизвика потенцијално опасни за живот срцеви аритмии.
Повеќето го внесуваат преку здрава исхрана која вклучува банани, слатки компири, грав и леќа.
6) Омега 3 масни киселини
Иако не се витамини, омега-3 масните киселини го заслужуваат местото на листава поради многуте здравствени придобивки кои ги овозможуваат. Истражувањата покажале дека тие помагаат за намалување на крвниот притисок и нивото на „лошиот“ LDL холестерол, намалување на ризикот од срцевите заболувања, а играат и голема улога во одржување на меморијата и мозочните функции.
Иако може да се внесува преку риба, ореви, ленено семе и лиснат зеленчук, најдобар начин за внесување на омега 3 се во форма на суплементи. Дозите се 500mg доколку сте здрави, 800 до 1000mg за оние со срцеви заболувања и 2000 до 3000mg за оние со високо ниво на триглицериди (секако, сите овие дозирања треба да се одвиваат по совет и контрола на доктор).
7) Пробиотици
Иако технички не се ниту витамини ниту минерали, пробиотиците се исклучително важни за жените над 40 години бидејќи го одржуваат здравјето на органите за варење и помагаат за одржување на тежината. Ова е особено важно во тие години кога мускулната маса се намалува, се развива инсулинска резистентност и телото е подложно на здебелување.
Иако ги има во некои млечни производи и ферментирани продукти како сејтанот, најдобро е да се земаат во форма на суплементи.