Додека опстанокот на повеќето списанија виси поради корона-панндемијава, најавено е дека прославеното „Playgirl“ од 1970-тите, повторно ќе излегува, со нов концепт и ќе биде место за современи женски пораки и вредности.
Тоа повторно е замислено како катче на различности, со содржини наменети за жените, пред сѐ. Списанието ќе има само печатено издание под мотото „Ние преземаме оттука“.
Првичното списание беше замислено како еден вид спротивставување на „Playboy“.
– Сè што направија во „Playboy“, направија и со „Playgirl”. Тоа беше занимливо неколку години, потоа го продадоа и потоа тоа се претвори во геј-порносписание, изјави Скај Парот, главна уредничка на новиот „Playgirl“.
Таа натаму вели дека како феминистичко списание, тоа треба да има поинакви цели.
– Светот во којшто живееме е создаден од мажи и сè се врти околу машките вредности. Сакам да создадам списание кое ќе понуди поинакво гледиште – женско. На голите слики ќе им се пристапи од перспектива на ранливост. За мажите, голотијата значи секс, за жената значи – изложеност. Тоа е сосем друга перспектива, додава Парот.
Во време на пандемија, одговорните за списанието работат од дома, додека децата им се околу нив.
– Поентата не е дека жените треба да се однесуваат како мажи, туку – што можеме да му понудиме на светот, во смисла на женските принципи, вели Парот.