Американскиот поп-џез-реге пејач Џони Неш, можеби најпознат по неговиот реге-хит од 1972 година – „I Can See Clearly Now”, почина на 80-годишна возраст, соопшти неговиот син Џон Неш Трети.
– Почина од природна смрт во неговиот дом. Тој беше прекрасен татко и семеен човек. Тој ги сакаше луѓето и светот. Ќе ни недостасува. Семејството за него беше се, изјави синот на Неш.
Хитот „I Can See Clearly Now” беше врвот на Билборд хот 100 топ-листата најпопуларни синглови во САД вкупно четири недели. Песната стана хит и во Канада, Велика Британија…
Неш е роден 1940 година во Хјустон, Тексас, САД, а својата кариера ја започна кон крајот на 1950-тите како пејач и актер.
Кон средината на шеесеттите, тој се преселил во Јамајка, каде што твореше под влијание на реге-стилот. Неговиот последен студиски албум „Here Again” беше објавен 1986 година.