Новиот електричен Citroen Ami е продукциската верзија на AMI One концептот прикажан на 2019 Geneva Motor Show.
Изгледот на концептот е во голема мера задржан – вклучувајќи го едноставниот дизајн кој користи исти панели на каросеријата за предниот и задниот дел, а вратите се отвараат во спротивна насока.
Овој двосед е долг само 2.41 метри, широк 1.39 метри, и висок 1.52 метри – правејќи го значително пократок и потесен од Smart ForTwo.
Спецификациите на Citroen Ami се дизајнирани да се користи за градско возење, а во некои европски земји ќе можат да го возат и 14 годишни лица без возачка дозвола.
Напојуван е од 5.5kWh литиум-јонска батерија што му овозможува домет од околу 70км., која целата може да се наполни за околу 3 часа. Максималната брзина на возилото е 45км/ч., што е уште еден доказ дека е дизајнирано за сообраќајните гужви во градовите.
И внатрешноста е скоро идентична со онаа на AMI One концептот – не постои конвенционален централен дисплеј, а наместо тоа се користи сопствениот смартфон кој функционира како infotainment дисплеј и навигациски екран. На воланот е монтирана најосновна инструмент табла, која најверојатно е вградена за да се задоволат законските побарувања.
Исто така не постои и конвенционален багажник, туку простор за багаж кај нозете на патниците и уште еден зад седиштата.
Citroen го гледаат овој модел како ривал не само на малечките градски автомобили, туку и на растечкиот тренд на електрични велосипеди во големите градски центри. Поради тоа, цените на Ami се флексибилни – на пример, во Франција може да се купи за €6,000, или пак долготрајно да се изнајмува за €20 месечно (во период од 4 години) , со депозит од €2,600.
На оние на кои им е потребна максимална флексибилност и алтернатива за електричните скутери, AMI ќе биде понуден и на Free2Move сервисот за изнајмување и делење на автомобили, по цена од €0.26 за минута возење.
Автомобилот ќе биде понуден во 7 различни верзии, со опционална опрема која ќе вклучува мрежа за складирање предмети на вратите, закачалка за торба и сл, а на располагање ќе бидат 4 бои за каросеријата.