Жителите на Париз кои се сопственици на моќни автомобили ќе треба внимателно да размислат пред да почнат да се фалат со нив.
Во делови од градот (како предградието Villeneuve-le-Roi) се тестира т.н. „радар за бучава“, систем направен од Bruitparif кој детектира бучни автомобили и евентуално ќе може да им издава казни. Системот користи микрофони со чија помош се триангулира потеклото на бучавата, а поврзан е и со CCTV камери за да се сними возилото кое ја прави.
Моментално се користат скоро 40 вакви радари и тоа близу разни барови во регионите за забава во Париз, како и околу 17 големи згради.
Пробното тестирање ќе трае 2 години и за тоа време нема никој да биде казнет, туку ќе се тестира одржливоста на технологијата и ќе се одредува нивото на бучава кое може да доведе до казни.