На 19-ти јули полицијата во Венеција казнила пар туристи од Берлин со глоба од €950 и од нив било побарано да го напуштат градот, а причината за тоа била што вареле кафе на преносна рингла на скалилата на историскиот мост Риалто.
Во овој град се забранети сите јавни пикници, т.е луѓето не смеат да јадат или пијат додека седат на некои локации како плоштадот Св. Марко или мостот Риалто.
Еве што сè е нелегално да правите во Венеција:
1) Седење на плоштадот Свети Марко
На овој плоштад е забрането да се седи, освен во кафулињата или рестораните. Казната за тоа изнесува €200, а есента 2018-та било предложено таа да се зголеми на €500, но тој закон сè уште не е усвоен.
2) Хранење на гулабите на плоштадот Св. Марко
Ова станало незаконско во 2008-ма, а причината за тоа е што изметот на птиците е киселкаст и може да ги оштети мозаиците во историските згради околу плоштадот. Оваа забрана важи и за јавните површини во градот, т.е на сите плоштади и канали. Казната доколку ве фатат во тоа изнесува помеѓу €50 и€200
3) Скокање или пливање во каналите
Доколку тоа го направите, ќе се соочите со казна од €450.
4) Ставање катанци на мостовите и други знаменитости
Оваа забрана е донесена во 2016-та, а казната тогаш изнесувала шокантни €3000. Сега таа е намалена на €100.
5) Шетање делумно гол или со костим за капење во јавност
Без разлика колку е топло во лето, мажите и жените кои шетаат без маици или кои носат костими за капење во јавност можат да бидат казнети €200.
6) Возење или туркање на велосипед во градот.
Само на локалните жители и на децата до 8 годишна возраст им е дозволено да возат велосипед во Венеција, а доколку ве фатат да го туркате казната изнесува €100.
Покрај полицијата, низ градот се шетаат т.н „ангели на пристојност“, кои ги набљудуваат туристите на најпосетените места, кои иако не можат да ги казнат или да ги избркаат од градот, можат да ја контактираат полицијата која тоа може да го направи.