Дроновите веќе вршат полно функции за нас – испорачуваат пакети, помагаат во мисии за пребарување и спасување и се дел од разните проекти за одржување на животната средина.
Но, немаме ефективен начин овие уреди да ги напојуваме за подолги временски периоди, бидејќи повеќето од нив можат да останат во воздух околу 30-тина минути.
Тоа наскоро може да се смени бидејќи војската на САД работи на развивање на систем со кој со ласер испукан од земјата би се напојувал воен дрон додека е во лет. Клучот е со него да се погоди фотоволтаичната ќелија на дронот која потоа светлината од ласерот ќе ја конвертира во електрицитет, а надежите се дека ова би можело да се постигне од оддалеченост од 500 метри.
Војската има неколку пречки кои мора да ги надмине пред овој систем да е спремен за употреба, од која најголемата е да не го истопи дронот бидејќи енергијата од ласерот која нема да биде конвертирана во електрицитет ќе се претвори во топлина која би можела да му предизвика сериозни оштетувања.
Доколку овој систем се усоврши, војската ќе има начин дроновите да ги одржува во воздух практично бесконечно, што би било корисно за континуирано набљудување на непријателот од воздух со дронови поставени над воени бази, а истиот би бил исклучително корисен и за цивилна употреба (во мисии за спасување и сл.)
Сега засега, војската развива систем доволно моќен да напојува дронови на земјата до 2019-та, а следниот чекор ќе биде напојување на дронови во воздух за што војската смета дека ќе биде спремна да го прави до 2020-та.