Астрономите конечно забележале формирање и ширење на брзо движечки млаз од материјал исфрлен од црна дупка, произлезен од процесот кога нејзината гравитација грабнува ѕвезда и ја распарчува.
Овој настан бил набљудуван со специјализирани телескопи вперени во пар галаксии кои се судираат наречени Arp 299, на далечина од скоро 150 милиони светлосни години од Земјата. Во центарот на едната од овие галаксии, една ѕвезда двојно поголема од Сонцето се приближила преблизу до црна дупка повеќе од 20 милиони пати поголема од нашето Сонце и била распарчена, исфрлувајќи млаз од материјал низ Универзумот.
Токму тој млаз бил забележан од астрономите од астрофизичкиот институт на Андалузија во Гранада, Шпанија.
Повеќето галаксии во својот центар имаат супермасивни црни дупки, но најчесто тие се тивки и не уништуваат ништо околу нив.
Истражувачите првенствено ги имале вперено телескопите кон оваа ѕвезда како дел од потрагата за Супернова експлозии во ваквите парови од галаксии кои се судираат, а за млазот во почетокот сметале дека е една токму таква експлозија. Но, кога забележале дека тој се шири, било потврдено дека неговото потекло е од ѕвезда која била уништена од црната дупка.